Gwasanaethau Cynhwysiant

Mae ymarferwyr Blynyddoedd Cynnar yn brofiadol o ran arsylwi a chasglu gwybodaeth bwysig am y plentyn.  Maen nhw'n gweithio i leihau rhwystrau amgylcheddol a chymdeithasol i gynhwysiant, ac yn cynnig cyfleoedd i bob plentyn gyflawni eu llawn botensial wrth baratoi at ddysgu pellach a bywyd. 

Bydd ymarferwyr Blynyddoedd Cynnar yn monitro cynnydd eich plentyn wrth iddo ddatblygu a thyfu.  Dylai'r broses hon nodi cryfderau'r plentyn ac unrhyw feysydd lle nad yw cynnydd y plentyn yn ôl y disgwyl.  Os codir unrhyw bryderon ynghylch cynnydd eich plentyn, dylid gwneud pob ymdrech i ddiwallu'r anghenion hynny o fewn y ddarpariaeth bresennol.

Mae lleoliadau Blynyddoedd Cynnar yn gwneud pob ymdrech i sicrhau bod anghenion pob plentyn yn cael eu diwallu gan ddefnyddio eu harbenigedd, eu hyfforddiant a'u gwybodaeth.  Dylai lleoliadau ddarparu amgylchedd cynhwysol effeithiol ac ymdrechu i ddileu unrhyw rwystrau posibl a allai rwystro datblygiad neu ddysgu.     

Beth ddylech chi ei wneud os oes gennych bryderon ynghylch datblygiad eich plentyn?​

Os oes gennych unrhyw bryderon am ddatblygiad neu gynnydd eich plentyn, dylid trafod hyn i ddechrau gyda'r lleoliad blynyddoedd cynnar y mae eich plentyn yn ei fynychu, neu ymwelydd iechyd.  Gall y lleoliad drafod yr hyn sydd ganddo ar gyfer eich plentyn a sut y mae'n diwallu ei anghenion.

Nid oes gan blant anghenion ychwanegol dim ond am fod eu cynnydd yn arafach nag eraill.  Pan ymddengys fod plentyn yn gwneud cynnydd cyfyngedig neu gynnydd araf iawn, naill ai'n gyffredinol neu mewn agwedd benodol ar ddatblygiad, yna efallai y bydd angen cyflwyno cyfleoedd gwahanol iddo, neu ddefnyddio dulliau amgen.   Gall anawsterau sy'n parhau ddangos bod gan eich plentyn anghenion ychwanegol sydd angen lefel o gymorth uwchlaw'r hyn sydd ar gael yn y lleoliad.

Beth fydd yn digwydd os gallai fy mhlentyn fod ag Anghenion Dysgu Ychwanegol?​​

Efallai y bydd gan ychydig iawn o blant anghenion sylweddol, cymhleth a gydol oes na ellir darparu'n rhesymol ar eu cyfer o fewn yr adnoddau sydd ar gael i'r lleoliad blynyddoedd cynnar.  Mewn rhai achosion, bydd angen darpariaeth ychwanegol ar leoliad blynyddoedd cynnar er mwyn cefnogi dysgu'ch plentyn.  Os yw hyn yn wir, yna bydd angen i naill ai'r lleoliad neu'r gweithiwr iechyd proffesiynol sy'n ymwneud â'ch plentyn hysbysu'r Awdurdod Lleol y gallai fod gan eich plentyn Angen Dysgu Ychwanegol (ADY).  Gellir gwneud hyn drwy wneud atgyfeiriad Blynyddoedd Cynnar yn Fforwm y Blynyddoedd Cynnar.

Grŵp aml-asiantaeth yw Fforwm y Blynyddoedd Cynnar sy'n cynllunio, monitro ac adolygu plant ag Anghenion Dysgu Ychwanegol neu Anableddau yn unol â Deddf Anghenion Dysgu Ychwanegol a'r Tribiwnlys Addysg (Cymru) 2018 –  – Deddf ADYTA 2018​​​​​​​​​Dolen yn agor mewn ffenestr newydd​

Mae'n bosibl bod rhai plant ag anghenion gydol oes arwyddocaol a/neu gymhleth eisoes wedi cael eu nodi fel rhai ag Angen Dysgu Ychwanegol neu Anabledd cyn dechrau lleoliad Blynyddoedd Cynnar.  Bydd Fforwm y Blynyddoedd Cynnar a/neu Dîm Cynhwysiant y Blynyddoedd Cynnar eisoes yn adnabod y plant hyn, wedi cynllunio darpariaeth briodol, a bydd yn parhau i fonitro ac adolygu eu hanghenion.

Gallwch gael rhagor o wybodaeth am Fforwm y Blynyddoedd Cynnar​​​​​​​​​​Dolen yn agor mewn ffenestr newydd​​

Anghenion Gofal Iechyd​

Efallai y bydd gan rai plant sy'n mynychu lleoliadau ag angen meddygol a/neu gorfforol a nodwyd sy'n gofyn am gynllun a hyfforddiant penodol, er enghraifft: plant â diabetes, alergeddau difrifol, bwydo enteral neu barlys yr ymennydd. Dylai cynlluniau a hyfforddiant priodol fod ar waith cyn i'r plentyn ddechrau'r lleoliad.  Mwy o wybodaeth am sut mae Awdurdod Lleol Caerdydd yn cefnogi plant sydd ag anghenion corfforol a gofal iechyd​​​​​​​​​Dolen yn agor mewn ffenestr newydd​​d