Prif nod y tîm Anawsterau Lleferydd, Iaith a Chyfathrebu (SLCD) yw meithrin hyder a gallu staff mewn ysgolion i ddiwallu anghenion disgyblion ag anawsterau lleferydd, iaith a chyfathrebu. Mae'r tîm yn cynnwys athrawon arbenigol, therapydd iaith a lleferydd a chynorthwywyr addysgu arbenigol.
Gall y tîm:
- Gynnig cymorth ychwanegol i ddisgyblion unigol
- Cynnig rhaglen hyfforddi arbenigol, a elwir yn ‘ELKLAN' ar ôl y bobl a'i chreodd. Mae athrawon a chynorthwywyr addysgu sy'n cwblhau'r cwrs hwn yn gymwys i gynnig cymorth arbenigol i ddisgyblion ag anghenion lleferydd ac iaith mewn ystafell ddosbarth gynhwysol. Bellach, mae gan y rhan fwyaf o ysgolion cynradd yng Nghaerdydd, a llawer o ysgolion uwchradd, gynorthwywyr addysgu ac athrawon sydd wedi cael hyfforddiant ELKLAN
- Helpu ysgolion i lunio rhaglenni arbennig i nodi a diwallu anghenion lleferydd ac iaith ar gam cynnar. Gelwir y rhaglenni yn Gysylltiadau Lleferydd a Chysylltiadau Iaith. Mae'r rhaglenni hyn bellach ar waith yn y rhan fwyaf o ysgolion cynradd ac maent yn cael eu cyflwyno mewn ysgolion uwchradd
Rhan bwysig o rôl y tîm yw cysylltu â thimau eraill yn y Gwasanaeth Addysg, therapyddion lleferydd ac iaith a rhieni i wneud yn siŵr bod pawb yn gweithio gyda'i gilydd i ddiwallu anghenion y plentyn.
Mae'r tîm hefyd yn cyfarfod â Grŵp Cynghori AFASIC yn rheolaidd, sy'n sefydliad gwirfoddol sy'n cefnogi plant ag anghenion lleferydd ac iaith.
Siaradwch â'r Cydlynydd AAA yn ysgol eich plentyn i ddysgu mwy am gymorth arbenigol i ddisgyblion ag anawsterau lleferydd, iaith a chyfathrebu. Cysylltwch â swyddfa'r ysgol i gael gwybod pwy yw Cydlynydd AAA ysgol eich plentyn.